帶同歌曲登上日本THE FIRST TAKE
不過進入錄音室時，Phil 還是免不了緊張，他道：「進入錄音室嘅時候，緊張一定有，但估唔到原來大家平時見到個畫面好似只有自己一個人喺度，但入到去其實鏡頭後有最少接近30人喺度做準備，所以有啲意想不到，不過到正式錄音時，大家就會全部離場。」從錄影片段可見到Phil初時以一貫的微笑表示：「Okay I’m Ready!」然後他便完全陶醉於音樂之中，中段唱到肉緊之時更緊握拳頭呢！錄音過後，Phil也即是鬆一口氣，他道：「當下第一時間諗到『Oh My God! 錄完喇！』因為籌備期間練習幾多次都好，正式嘅時候係有好多Pressure，但完成嗰一下成個人即刻放鬆，可以真係Enjoy The Moment多啲，我仲同每個同事都擁抱，哈！」能夠在〈高山低谷〉推出十周年登上TFT，Phil坦言這是莫大的榮幸，更道：「能夠唱廣東歌實在太好，希望可以俾全球認識廣東音樂。」
〈高山低谷〉對於Phil來說別具意義，因為當時這是一首決定Phil歌唱事業的一首作品，所以他一直銘記歌詞內容，他更道：「〈高山低谷〉記載住我人生好重要嘅一刻，由最唔開心到我企得返起身，而家呢首歌成為咗鞭策我嘅歌，佢唔係淨係講低谷要點樣面對，佢仲可以講到喺人生唔同期間，都會遇上唔同高山低谷，會時刻提醒我，要繼續行落去，個終點依然未達到，所以唔可以停唔可以放棄，就好似歌詞咁講：腳下路程難以削短。」
另外，陳詠謙特別提到〈高山低谷〉歌名的由來，他說：「本身未有歌名，係先寫咗『你界定了生活 我侮辱了生存』呢句，但前面加多句『你快樂過生活 我拼命去生存』，令成份歌詞有一份推進。後來見副歌前有三連音的部份，想到『高的山低的谷』呢幾隻字，加上香港好多山，有錢人又多數住喺半山，配合埋前面歌詞，就有〈高山低谷〉呢個歌名。」早前宣布太太陀B，今年準備當爸爸，正值人生美好的時光，但Phil分享心情道：「我唔覺得自己而家喺高山，因為覺得可以再好啲，同時亦都會提醒自己唔好俾自己入到低谷，繼續鞭策。」
